ఎప్పటిలాగే ఈ సారి కూడా దసరా రానే వచ్చింది.... కాని ఎందుకో ఈ సారి సరదా మాత్రం తీసుకురాలేదు... పెద్దవాళ్ళం (?) అవుతున్నామనో లేక చిన్నతం నుంచి దూరం పెరిగిందనో లేక గతాన్ని పదిలంగా దాచిన ఇంటికి దూరంగా ఉన్నాననో కారణం ఏదైతే ఏమి సరదాలు తెచ్చే దసరా మాత్రం ఈ సారి ఎందుకో సాదా సీదాగా గడిచిపోయింది...
చిన్నప్పుడు దసరా సెలవుల కోసం ఎంతగా ఎదురుచూసేవాల్లమో, ఏ ఊర్లు వెళ్ళాలో ఏం చెయ్యాలి అని తెగ ఆలోచించేసేవాళ్ళమో.... కాని ఇప్పుడు కనీసం ఒక్క సెలవు వచ్చినా చాలు అని అనుకుంటున్నా. ఈ సారి మాత్రం ఒక వారం రోజుల పాటు సెలవు తీసుకుని ఇంటికి వెళ్ళిపోదాం అని ఎప్పటినుంచో ప్లాన్ చేసేసాం, కాని అనుకోని కారణాల వల్ల వెళ్ళలేకపోయా.... ఎప్పుడో మూడు నెలల ముందే రిజర్వు చేయించుకున్న ట్రైన్ టికెట్లు బయలుదేరే రోజు వెళ్ళటం కుదరక కాన్సిల్ చేసేస్తుంటే మనసు జువ్వని పీకేసింది....
పాలవాడు, పోస్ట్ మాన్ ఇలా ఒకరేమిటి అందరూ దసరాకి దసరా మామూళ్ళు అడగటం, ఏదో ఒకటి చెప్పినా సరే మొత్తం మీద అమ్మా నాన్న ఆ మామూళ్ళ వలలో చిక్కుకునేవాళ్ళు... కాని ఈసారి దసరా మామూళ్ళు అంటూ ఇక్కడ నన్ను ఒక్కరూ అడిగిన పుణ్యాన పోలేదు... చిన్నప్పుడు ఎప్పుడో స్కూల్ లో చదువుకుంటున్న రోజుల్లో "అయ్యవారికి చాలు ఐదు వరహాలు, పిల్ల వాళ్లకు చాలు పప్పు బెల్లాలు" అనే పాట రాసుకుంటుంటే , ఆ పాట గురించి అమ్మ చెప్తూ ఇంకొన్ని పాటలు పాడుకుంటూ వాళ్ళ ఊరిలో అందరి ఇంటికి తిరుగుతూ వెళ్ళేవారమని అమ్మ చెప్పటం ఇంకా ఇప్పటికీ గుర్తే... అమ్మ చేసే రకరకాల పిండివంటల తో టీవీలో వచ్చే వెరైటీ ప్రోగ్రామ్స్ కోసం ఆతురుతగా ఎదురుచూడటం కూడా గుర్తుంది... దసరా ముందు రోజు (ఆయుధపూజ) నాన్న, అన్నయ్య, నేను స్కూటరు సైకిళ్ళు కడిగేసుకుని బొట్లు పెట్టేసి వెలిగించిన అగరబత్తుల సువాసన ఇంకా మరచిపోలేదు.... కాని ఇప్పుడు అంతకన్నా ఖరీదైన బండే ఉన్నా, చేసుకునే తీరిక (?) చెయ్యాలనే సరదా లేదు...
ఈ నిస్సత్తువ పరిగెడుతున్న కాలాన్ని వెంబడించటం వల్ల వచ్చిన ఆయాసం వల్లనో... సరదాలు సరాగాలుగా ఉన్న సొంత ఊరికి దూరంగా ఉండటం వల్లనో తెలీదు గాని ఈసారి దసరా సరదాలు మాత్రం పరదాలు వేసి కొంచెం దూరం జరిగాయి... వచ్చే దసరాకి అయినా "దసరా వచ్చిందయ్యా సరదా తెచ్చిందయ్యా" అని పాడుకుంటూ ఉండాలని ఆశిస్తూ...
No comments:
Post a Comment